Carlos: Airport RT-PCR test needed

28

Davao City – Usa sa gikonsidera nga haligi sa ekonomiya sa Pilipinas ang industriya sa turismo tungod sa dakung oportunidad sa pangempleyo ug ang pag-andar sa mga negosyo nga maghatag og binilyon ka pesos nga kinitaan sa gobyerno pinaagi sa makolekta nga buhis.

Mao kini ang nakitang dakung rason ni Prof. Clarita Carlos sa University of the Philippines (UP Diliman) kinsa Executive Director sa advocacy group nga Stratfor Foundation kun nganong panahon na karon nga buksan ang atong mga borders pananglit ang atong mga international flights human ang pito ka bulan nga kumbate kontra sa COVID-19 global pandemic.


Matud ni Carlos, walay basihan aron padayon natong did-an ang mga langyaw nga makalupad paingon denhe sa atong nasud, ilabi na kadtong mga foreign investors sa tinguha nga pahimsogon nato pag-usab ang atong nagkarabanit nga ekonomiya.

Base sa mga datos nga nasagap sa Philippine Tour Operators Association for Tourism, nalugi na ang nasud og P190B income gikan niadtong March hangtud July karong tuiga gumikan sa gipatumang strict travel restrictions sa mga kanasuran sa kalibutan sa tumong nga pag-aresto sa infection sa virus.

Sugyot ni Carlos nga angay hugtan ang mga rekwisitos diin ang tanang langyaw nga muabot sa airport, pangayoan kini og RT-PCR negative result o dili ba kaha i-swab test ug kung mag-positibo, ipailawom gilayon sila sa 14-day mandatory quarantine diha sa mga designated isolation facilities.

Ug kung unsa man ugaling ang ipatuman nga protocol alang sa mga foreign arrivals, mao usab kini ang angayang i-imposar nga palisiya alang ngadto sa mga Locally Stranded Individuals (LSIs) ug mga Returning Overseas Filipinos (ROFs), matud sa iladong political science professor.




RadyoMaN Joel Viray

Facebook Comments