Gimando-an ni City Police Director Col. Henry Dampal ang station Commander sa Carmen Police Station nga iyang personal nga i-supervise ang mga police personnel nga gitahasan sa pagbantay sa ilang police check point sa Zone 9, Sityo Macanhan, Carmen ning syudad sa Cagayan de Oro.
Kini aron masiguro nga walay laing tawo nga makasulod sa maong lugar gawas lamang kadtong mga residente sa maong dapit.
Una pa niini, gimando ni Mayor Oscar Moreno nga serhan ang Zone 9, Sityo Macanhan, Carmen human gikumpirmar sa mga health officials nga dunay bag-ong nag-positibo sa Coronavirus disease o COVID-19 nga usa ka 59 anyos nga babaye kinsa silingan sa unang nagpositibo sa maong virus nga una nang namatay.
Matud ni Police Major Ivan Viñas nga gusto ni Dampal nga masunod sa husto ang mando ni Mayor Moreno silbing tipik sa hugot nga kampanya sa iyang administrasyon batok sa Covid-19.
-o0o-
