BACOLOD CITY – Patay ang isa ka notorious nga hold-upper kag carnapper sa Bacolod matapos nga nagbato sa mga katapo sang kapulisan sang ini ang gin-serbehan sang warrant of arrest sa kaso nga robbery kahapon sang hapon.
Subject sang warrant amo si Jibbert Villanueva, sang Purok Lubi Brgy. 3, syudad sang Bacolod.
Si Villanueva ang paga-serbehan kuntani sang mandamiento de aresto sang Police Station 4 sang makit-an ini sa dalan Lopez-Jaena kahapon, apang imbes nga mag-surrender nagdalagan ang suspek kag nagpanago ini sa sulod sang balay sang iya abyan sa Mazo-lnn Agustine St., sa Brgy. Villamonte.
Lakip sa nag-lagas kay Villanueva amo si PO2 Vicente Pabuaya nga amo man ang naka-tiro sa suspek.
Suno sa hepe sang Police Station 4 – Chief Insp. Ritchie Gohee, nga ila pilit nga gin-buksan ang balay nga ginpana-ugan sang kawatan apang nakit-an sang pulis nga naka-tutok na sa ila ang armas ni Villanueva rason nga napilitan si P02 Pabuaya nga tiruhon ang suspek.
Ini siya ang naka-angkon sang pilas sa dughan kag li-og nga gintuna-an naman sang iya kamatayon.
Nahibalu-an nga antis nadakpan kag napatay si Villanueva, nakapang-biktima pa ini kag nakapang-hold up sa dalan Burgos-Lopez Jaena.
Ang biktima diri amo si Rowena Benjamin, 48 anyus, resisidente sang Prk. Sulom 1, Brgy. Mandalagan, syudad sang Bacolod.
Mga pasado alas 2 kahapon sang hapon sang naga-sakay sang jeep ang biktima ang nagsaka ang duwa ka mga lalaki lakip na didto ang notorious nga si Villanueva.
Gintaya-an naman sang armas luthang ang biktima kag gindala ang iya bag- nga naga-unod sang kapin sa P183 mil pesos.
Si Villanueva ang positibo naman nga gin-tudlo ni Benjamin nga amo ang nag-hold up sa iya pila ka oras antis ini ang na-tiruhan kag napatay.
