Makadawat sa tag- 2 mil pesos ang kada benepisiyaryo sa ayuda nga gikan sa Provincial Government of Bukidnon sa dakbayan sa Malaybalay.
Nasayran nga gi-anunsiyo sa LGU Malaybalay nga sugdan na ang pag-apud-apud sa cash assistance o ayuda sa siyudad karong Adlaw, Abril 20, 2020.
Matud ni CSWD – OIC Ivy Amor Urbina, nga ang cash assistance mao kaning gidownload nga 84 million pesos alang sa Malaybalay City.
Matod pa ni Urbina, gisubay nila ang guidelines nga gipagula sa Provincial Government nga ang pagahatagan kadtong indigents o poorest of the poor.
Sa among guidelines usab, gipasabot nga dili makadawat ang kadtong (1) miyembro sa 4Ps (2) miyembro sa MCCT – Ips ug (3) social pensioners.
Ang mga barangay usab gitahasan sa pag-validate sa maong lista, ug igo lamang gituboy ang maong cash assistance o ayuda sa City Government aron mas madali ang pag-apud-apud niini. Kung aduna’y mga pangutana, giaghat kamo nga makigsusi sa inyong opisyales sa barangay.
Gipasabot ni Urbina nga ang ilang buhatan, uban sa City Treasurer’s Office, igo lamang gitahasan sa pagdisburse o apud-apud sa mga nalista’ng makadawat.
Gipahibalo ang mga hintungdan nga magdala sa ilang ID sa ilang pagdawat o claim sa cash assistance.
Kung dili makaadto mismo sa designated distribution area, ang inyong gisugo sa pag-claim dapat magdala sa inyong ID ug ila usab nga ID. Ipadala usab sa maong gisugo ang authorization letter para magpamatuod nga sila ang inyong gitugutan sa pag-claim sa maong cash assistance.
