NEGROS OCCIDENTAL – Ginaklaro karon sang Philippine National Police nga ila ginatinguhaan ang tanan agud nga gilayon masulbar kag mahatagan hustisya ang kamatayon sang siyam ka mga tawo sa natabo nga mass killing sa Brgy. Bulanon, Sagay City sadtong Sabado sang gab-i.
Sa ginpagwa nga statement sang Negros Occidental Police Provincial Office paagi kay PSSupt. Rodolfo Castil, ginaremind sini ang publiko nga mangin responsible sa pagpagwa sang impormasyon angut sa natabo nga massacre sa Hacienda Nene.
Base sa imbestigasyon nga ginpatigayon sang task force nga gintukod sang NOCPPO sa pagpanguna sang CIDG mga katapo sang rebelding NPA ang nagapanguna nga suspek sa amo nga krimen.
Samtang, wala labot sa NPA, ginapadaluman pa gid sang pulis ang imbestigasyon sa nabaton nila nga impormasyon nga posible may kahilabtanan sa amo nga mass killing ang Cafgu Active Auxilliary ukon CAA subong man miembro sang RPA/ABB ukon bisan pa ang tag-iya sang duta.
Sa karon nagapabilin ang P500,000 pesos nga reward money para sa sin-o man nga makatudlo kag makahatag sang impormasyon angut sa mga suspek nga nagpaarak sang luthang nga nagresulta sa kamatayon sang syam ka mga mangunguma nga miembro sang NFSW./dyHB BACOLOD
