TACLOBAN CITY – Malusad ha pwesto kumo mayor han Catbalogan City, Samar hi Stephany Uy-Tan kun makarawat na niya an six-month suspension order han gin-aaligar overpriced ha pagpalit hin tuna.
Pero pagklaro ni Uy-Tan, waray pa hiya nakakarawat nga suspension order tikang ha Office Of The Ombudsman ngan magpapadayon la gihapon hiya nga malingkod kumo Mayor han syudad.
“Until now kami pa an nalingkod, kami an napirma ngan kita pa an ada ha city hall. Pagmakarawat na namon [an suspension order] siguro ansya la ito it time nga ma-step down kami pero as of the moment diri pa kita suspended.”
Aakseptaron han alkalde an suspensyon para magtikang na an imbestigasyon.
Dida han Nobyembre 26, gin-aprobaran ni Ombudsman Samuel Martires an preventive suspension kan Uy-Tan ngan pira nga council officials han syudad ngan maatubang hin reklamo nga abuse of authority, grave misconduct, ngan gross neglect for the purchase of land from private individuals.
Basi ha complainant nga hi Bernard Jake Ramos, an mga nasabi nga opisyal in pumalit hin tuna (agricultural lands) ha kantidad nga P120,225,000 bisan an market value hini in aada la ha P155,497.84
Iginpanhimuwa naman ini han alkalde, siring niya, PHP1,500 per square meter la an ira palit han tuna.
Patutsada ni Uy-Tan, politika an nagpapaluyo hini nga sitwasyon.
“Yana they’re trying their best, nag-aaragaw na hira kun hin-o an maa-appoint kay hira ngatanan kuno close kan Presidente. Masyado silang advance mag-isip kasi andvance na an ira nai-imagine nga an ira self an malingkod. Let us be reminded nga mas marasa lumingkod nga ginpili ka han tawo.”
Apil nga suspendido hira Vice Mayor Art Gabon; Councilors Coefredo Uy, Jeffry Uy, Maximo Pescos, Edward Uy, Christine Joy Escobar, Beethoven Bermejo, Ngan Nanette Jasmin; City Assessor Romero Tuazon; Assistant City Assessor Arthur Macabare; ngan Office of the City Assessor employee Rizal Ignacio.
