Posibling moaway ang mga banggiitang boksidor sa Cagayan de Oro City amateur boxing team sa umaabot 2019 Arafura Games nga ipahigayon sa Darwin, Australia karong Abril 26 hangtud Mayo 4 ning tuiga.
Kini human gipahibalo si Mayor Oscar Moreno pinaagi ni Philippine Sports Commission Chairman William I. Ramirez nga usa ang Cagayan de Oro sa mga local government units nga gi-konsiderar magpadala og usa ka delegasyon nga maoy molangkob unya sa Team Philippines.
Nasayran nga ang Arafura Games usa ka multi-sport event diin magtigi sa ilang abilidad sa 18 ka events ang dili momenos 3,500 ka mga atleta gikan sa 30 ka nasud sa tibook kalibutan.
Gawas sa boxing, mosalmot ang Team Philippines sa dulang athletics, badminton, basketball, beach volleyball, muay thai, sepak takraw, swimming, table tennis, tennis ug weightlifting.
Ang CdeO boxing team maoy gikaintapan karon sa tibook Pilipinas sanglit ang boxing team sa syudad maoy defending champion sa Palarong Pambansa, Philippine National Games, Batang Pinoy ug Philippine Sports Commission-Pacquiao Amateur Boxing Cup.
Daghan na usab ang mga produkto sa amateur boxing development program ni Mayor Moreno nga gi-recruit karon isip mga miyembro sa RP national boxing team sama ni 2018 Asian Games bronze medalist Carlo Paalam ug daghan pang uban.
