Na-alarma na si Mayor Oscar Moreno sa sunod-sunod nga pagpangambus ning syudad sa Cagayan de Oro nga niresulta sa pagkasamad sa usa ka police ug usa ka barangay official.
Kini ang hinungdan kon nganong si Mayor Moreno, nanawagan sa mga otoridad nga ilang dalion ang imbestigasyon sa pag-ambush ni Supt. Michael John Deloso ug kagawad Jonathan Joseph Borja sa Barangay 3.
Kon mahinunduman nga si Supt. Deloso sakay sa iyang Nissan Van ug gi-ambush sa duha ka nagmaskarang mga tawo duol sa Misamis Oriental Provincial Capitol niadtong Martes sa buntag samtang si Kagawad Borja, sakay sa iyang Montero Misubishi ug gi-ambush sa wala mailang suspek sa Barangay Nazareth mga alas 7:15 sa buntag kagahapong adlawa.
Matud ni Moreno nga iyang gilauman nga pinaagi sa Special Investigation Task Group, madali unta ang pagsulbad sa duha ka sunod-sunod nga pag-ambush sa duha ka biktima ug mailhan ang mga suspek ug mataral sa hukmanan.
