Nanghinaot ang Cebuana bar Topnotcher Karen Mae Calam, nga mamahimo siyang inspirasyon dili lamang niadtong mga tawo nga nangandoy nga mahimong abogado, lakip sa uban nga maningkamot aron ilang makab-ot ang ilang pangandoy. Si Calam, kinsa ni-gradwar sa kurong abogasiya sa University of San Carlos, maoy nanghawod sa 2016 bar examination, human nahimong top-1 sa resulta sa maong pasulit. Nasayran nga si Calam usa ka Certified Public Accountant usab, una mikuha sa kursong abogasiya. Gawas kaniya, laing tulo ka mga tinun-an sa USC ang nakasud sa top-10 sa maong pasulit, nga gilangkuban nilang Fiona Cristy Lao sa 3rd place, Anne Margaret Momongan sa 7th place ug Jefferson Gomez sa 8th place. Suma ni Calam nga wa gyud siya magtuo nga siya maoy mamahimong topnotcher sa bar exam, apan iyang giangkon nga siya nangandoy nga makasud sa Top 10. Ang maong kalampusan, iyang gipahinungod sa iyang mga ginikanan tungod kay kini maoy ilang pangandoy alang kaniya ug sa ilang kaugalingon. Giangkon hinoon niini nga dunay higayon nga siya maglisod sa iyang pagtungha, hilabi na nga usa siya ka working student, apan pinaagi sa time management, hinungdan nga iyaha ra’ng nabuntog ang mga hagit sa iyang kinabuhi. Angay usab nga mosunod ang mga tinun-an sa mga butang nga gustong patun-an ug ipabasa sa ilang mga maestra, tungod kay dako kini ug ikatabang panahon nga mokuha ug bar exam. Gitug-an usab ni Calam nga siya deboto ni Sr. Sto. Niño ug ni Mama Mary, diin atol sa bar months, kada adlaw kining mosimba. Wala pa hinoo’y plano si Calam human mi-top sa bar exam, apan gitataw niini nga magpabilin lang una siya sa iyang trabaho ug bukas usab siya sa pagdawat ug pro bono nga mga kaso.
