BACOLOD CITY – Nagreklamo sa pulis ang isa ka lalaki matapos nga iya nakita nga gina-baligya online ang iya cellphone nga ginkawat sa iya sang nagligad nga Biernes sa Brgy. Mansilingan, Bacolod City.
Suno sa biktima nga si Ramel Temporosa nga ang insidente natabo may mga las 9:50 sang gab-i sadtong Biernes, January 18 sa bangga Paglaum Village, Murcia Road, Brgy. Mansilingan, ciudad sang Bacolod.
Pahayag sang biktima nga samtang ini ang nagatindog hinali na lamang nga gin-snatch sang tatlo ka mga suspek nga nagasakay sa motorsiklo ang iya cellphone.
Nakilala ang tatlo ka mga suspek nga sanday Elmer Martinez, Wendyn Cris Dionela, 21 anyos kag Rexan Pescadero.
Apang sang masunod nga adlaw, Sabado, January 19, 2019 may mga la 1:45 sang hapon iya nakita ang iya cellphone nga ginabaligya sa “online buy and sell.”
Bangud sini, gilayon nga nagpatigayon sang entrapment operation ang Police Station 7 kag naaresto ang mga suspek.
Makabig nga dimalas ang mga suspek bangud nga wala labot sa cellphone nga nakuha sa ila possession, may na-recover pa gid nga isa ka sachet sang suspectd shabu nga naga-balor P500 pesos, isa ka improvised firearm kag drug paraphernalia./dyHB BACOLOD
