Gireklamo sa mga residente sa Sityo Botoc, Barangay Mandangoa, Balingasag Misamis Oriental ang abog ug balas nga binuga gikan sa usa ka planta sa nasangpit nga lugar.
Nasayran nga adunay coal sa area nga wala tabuni, hinungdan nga kung kusog ang hangin, didto paingun sa mga residente ang ibuga niini.
Nasayran usab nga taudtaud na ang maong problema ug napaabot na kini sa mga residente ngadto sa Barangay, lungsod ug Department of Environment and Natural Resources apan walay aksiyun nga nahitabo.
Kini ang hinungdan nga midangop sa DXCC ang mga residente aron nga matabangan kalabot na sa maong problema.
Samtang, walay written report nga miabot ngadto kang Balingasag Mayor Marieta Abogado, kalabot na sa problema sa mga residente sa power plant sa sityo Botoc, Barangay Mandangoa, Balingasag Misamis Oriental.
Matud ni Mayor Abogado nga tungod niini, iyang sutaon ang maong problema aron nga matagaan og saktong aksiyun.
Dugang pa sa maong opisyal nga walay bisag usa sa barangay officials nga miduol kaniya hinungdan nga wala siya makahibalo sa problema.
Tungod niini, dako ang pasalamat ni Mayor Abogado sa RMN DXCC sa pagpaabot sa nasangpit nga problema ug misaad nga iya dayung ipasusi ang area aron nga matagaan og dinaliang aksiyon.
