SALVADOR BENEDICTO – Apat ang kumpirmado patay samtang pito ang pilason matapos nahulog ang Ceres bus pasado alas-8:30 kagab-e sa Sitio Talos, Barangay Igmaya-an.
Ang amo nga Ceres Bus ang may plate number nga AAB-9726 sa diin naghalin ini sa syudad sang San Carlos kag manugpadulong na kuntani sa Bacolod sang natabu ang aksidente.
Ang driver sang bus ang nakilala sa kay Jezer Rasonable, 47 anyus, residente sang Barangay Mansilingan, syudad sang Bacolod.
Ang conductor amo si Mark Reovaca, 31, residente man sang Barangay Mansilingan.
Suno sa traffic investigator sang DSB PNP nga si SPO1 Art Zureta nga nagapadulhog ang Ceres halin sa San Carlos kag pag-abot sa Lion’s Park sa Barangay Igmaya-an, nagpuswak ang preno kag didto na nag-rekta sa pil-as bangod wala na ini sang kontrol.
Dugang pa ni Zureta nga gintingwa-an pa sang driver nga mag-engine brake apang wala man ini nag-gana rason nga nag-singgit nalang ini sa iya mga pasahero nga magpangamuyo bangud nga wala na nagahawid ang ila nga preno.
Napatay on the spot sanday Jason Manaba, 21 years old, Calatrava; Christian Jude Leonida kag iloy sini nga Rainera Leonadia. May isa man ka lady victim nga wala pa sang identity tubtob karon.
Pito naman ang pilason lakip na diri ang driver kag konduktor nga ara karon sa Bacolod Adventist Medical Center.
