Subling nanawagan si Konsehal Lourdes Gaane, Chairman sa komite sa panglawas sa Cagayan de Oro nga mapalapdan pa ang kampanya kontra rabies.
Lakip niini mao ang kaakuhan sa matag nanag-iya og mga mananap nga mahimong responsable sa ilang mga binuhi.
Kini nunot sa taho nga iyang nadawat kalabot sa kakulangon sa stocks o’ supply sa anti-rabies vaccines diha sa mga tindahan ilabina nga gasaka ang kaso sa pagpamaak sa iro ning panahon sa ting- init.
Mahinumduman nga si Dr. Fe Bongcas mipahibalo nga ang Glaxo, supplier sa bakuna, naghunong na sa pag-produce sa ilang anti-rabies vaccines tungod kay usa sa ilang laboratoryo nakontaminado.
Sa miaging tigom sa komite, gipasabot ni Bongcas nga ang supply sa human anti-rabies diha sa City Health Office gilauman nga kutob lang niadtong Abril 25 ug nasayran nga wala nay stocks sa Carmen Health Center ug JR Borja General Hospital.
Samtang gipasalig ni Dr. Perla Asis sa City Veterinary Office nga ang ilang buhatan nagpahigayon sa halapad nga impormasyon kalabot sa responsableng pagbuhi ug pagpanag-iya sa mga mananap pinaagi sa tri-media diin lakip sa hisgutan mao ang clinical animal behavior.
Giaghat usab ni Gaane ang City Veterinay Office ug CHO nga magpahibalo sa katawhan kalabot sa kakulangon sa bakuna kontra sa rabies ug pagpalapad sa kampanya sa kabarangayan aron malikayan ang pagtaas sa kaso sa pagpamaak sa iro.
CIO
