Davao City – Mokabat na sa 95.6% ka mga batang nag edad 5-anyos paubos ang nabakunahan sa programang gilusad sa Department of Health (DOH) nga Patak Kontra Polio dinhi sa syudad sa Davao.
Kini base sa datos gikan sa City Health Office (CHO) as of alas-4:00 sa hapon sa Oktubre 23, 2019.
Sumala ni Dr. Julinda Acosta, Chief of Technical Division sa CHO, sagad sa mga nahuman gikan sa hilit nga lugar sama sa Paquibato District nga dunay 101% coverage ug Marilog District nga dunay 114% coverage.
Matud ni Acosta nga sagad sa 4.4% nga kulang naggikan sa duol sa sentro nga bahin sa Davao gani ginatutukan nila kini sama sa District B kun asa daghan ang commercial areas sama sa Bajada, Talomo North, Buhangin district nga dunay 79.5% coverage, ug Sasa nga dunay 85.2 % coverage pa lamang.
Hinuon gibutyag sa maong doktor nga nagapadayon sa gihapon ang ilang house to house nga kampanya ilabi na nga upat ka adlaw nalang mahuman na ang unang hugna sa programa.
Saysay sa opisyal nga pipila sa ilang giatubang nga problema mao ang kahadlok ug pagdumili sa pipila ka ginikanan nga mabakunahan ang ilang anak sama sa usa ka Subdivision nga wala gipasulod ang staffs sa Health division.
Gipasabot ni Acosta nga kinahanglan gayud kumpletohon ang tulo ka hugna sa bakuna kontra polio diin mahitabo sa Nobyembre 2019 ug Enero sa 2020 kung asa target nila ang 100% coverage sa nahibiling duha ka hugna.
RadyoMaN Jason Amisola
