Davao City – Padayon karon ang ginahimong preventive ug control measures sa City Health Office (CHO) kontra sa balatian nga dengue nga dala sa lamok.
Sa pakighinabi sa DXDC RMN Davao kang Ernie N. Cequina, usa ka nurse nga na-assign sa Tropical Division sa CHO – Davao City, gikumpirma niini nga padayon ang ilang ginahimong fogging ug soaking ingon man lectures sa mga kabarangayan ug mga eskwelahan.
Gipasabot ni Cequina ginahimo ang ginatawag nga soaking kung positibo ang usa ka lugar sa lamok nga nagadala sa maong balatian diin ginahumol ang mga kurtina ug mga moskitero sa kemikal nga maoy mubatok sa mga lamok ug uban pang insekto.
“Ang komunidad, atong ginapadala nato og mosikitero ug kurtina, ginapabutang nato og balde ug kami sa City Health Office, magbutang mi og kemikal ngadto sa dako nga laton or drum unya ihumol nato ang mga moskitero ug kurtina aron aduna silay proteksyon sulod sa unom ka bulan,” saysay ni Cequina.
Nag-awhag usab ang CHO ngadto sa katawhan nga mamahimong responsible sa pagpanglimyo sa sulod ingon man palibot sa panimalay aron malikay sa unsa mang balatian.
RadyoMaN Kirby Manzon
