Christmas Festival Celebration sa Surallah himuong simple

23

Surallah, South Cotabato— Himuong simple ang selebrasyon sa kapaskuhan sa giilang Christmas Capital sa probinsya sa South Cotabato nga mao ang Munisipyo sa Surallah.

Sukwahe kini sa naandan nga bongga ug sadya nga Christmas Festival sa lungsod sa Surallah matag Pasko.


Sumala ni Surallah Mayor Antonio Bendita, simple lang ang ilang selebrasyon karong tuiga, layo sa mga naandan na sa mga katawhan sa ilang lungsod. Nasayran nga ang Surallah ginadagsa sa katawhan nga naggikan sa ilang lungsod ingon man mga turista gumikan sa sadya ug nindot nga dekorasyon ingon man mga pasundayag matag gabie sugod palang sa Disyembre 1 hangtud na sa Disyembre 30.

Dugang pagbutyag ni Mayor Bendita nga gustuhon man nila nga himuong bongga ang selebrasyon, dili nila kini mahimo gumikan mahinungdanon alang kaniya ang kinabuhi sa tawo dungan na usab sa nasinatiang Covid-19 pandemic. Gibutyag pa sa Mayor nga ilang ginalikayan ang pagtapok tapok sa mga tawo aron nga malikayan ang pagsaka sa ihap sa kaso sa covid-19 sa ilang lugar.

Dungan niini, nihangyo ug pagsabot ang Mayor sa katawhan sa lungsod ingon man sa tibuok probinsya sa South Cotabato ug sa mga turista gumikan ang ilang gidepensahan ang panglawas sa katawhan nga dili mataptan sa balatian. Gibutyag usab ni Mayor Bendita nga hangtud nga wala pay bakuna batok sa covid-19, dili gyud dapat mokumpyansa ug dapat sundon gyud ang tanang mga health protocol para malikayan ang pagsaka sa kaso niini. Samtang ang pondo nga anaa sa 7 million ngadto sa 8 million nga ilang gamiton unta sa maong selebrasyon, ila nalang gihatag ngadto na sa mga katawhang kabus sa ilang lungsod nga wala nakadawat ug Special Amelioration Program kon SAP ni Pangulong Rodrigo Duterte.

Facebook Comments