PAKIGDAYALOGO SA TRICYCLE DRIVERS GIPAHIGAYON UG PANAGSABOT NAPAHIMUTANG
Personal nga gibisita ni Butuan City Administrator Rey Desiata ang mga lideres sa mga tricycle drivers diha mismo sa ilang terminal aron mapaminawan ang ilang mulo kabahin sa gipatuman nga tricycle routing plan sa dakbayan sa Butuan.
Matud pa ni Desiata, ang lokal nga panggamhanan misanong sa Memorandum sa DILG ug nagpatuman sa mga ordinansa niani. Apan base sa aktwal nga kasinatian, maghimo na kini og mga alternatibong solusyon sa papatuman sa maong route plan aron mapahimutang ang mulo ug suhestyon sa mga tricycle drivers.
Kini karon ang kasamtangan nga lakang sa Tricycle Task Force sa dakbayan samtang ginakumpleto na ang mas komprehensibo nga Tricycle Route Plan diin mapahimutang na ang mga rota ug maserbisyohan ang sumasakay sa nagkalain-laing dapit sa dakbayan.
“Paspasan namo ang paghimo niining tricycle route plan pinaagi sa sunod-sunod nga konsultasyon sa mga drivers. Hopefully by next week mahuman na kini,” matud pa ni Desiata.
Matod pa ni Mr. Erik Laag, usa ka tricyle driver, dugay na silang gabiyahe sa travel line sa Mahogany Riverside Tricycle Operators and Driver Association.
“Gamay hangyo lang namo nga kining orange nga dunay ribite nga green kung pwede hatagan dayon og pagtagad ug hatagan nami og kanang choice nga maka-agi na sa tulay makapamasahero terminal to terminal among gihangyo total naa namay ordinansa” sigon pa ni Laag.
Kini usab ang problema sa mga orange tricycle nga kaniadto gabiyahe sa San Vicente. Buot na nilang magpa convert na sa yellow code tricycle aron permanente na silang makasulod sila sa fixed route.
Pero sa pagpasabot ni City Administrator Rey Desiata, wala gidid-an ang mga orange tricycle sa pagbiyahe sa mga dagkung lugar gawas na lamang sa mga lugar o zones nga duna nay designated nga fixed routes.
Matud pa ni Desiata, dunay mga adjustments sa implementasyon base sa panginahanglan sa mga pasahero aron mapaniguro nga adunay igong kasakyan ang publiko.
Hangyo usab ni Desiata sa mga tricycle drivers ug operators nga hatagan pa og igong panahon ang LGU Butuan nga ma finalize ang mga datos sa mga pasahero sa lain laing lugar mga maoy mamahimong basehan sa pagdetermina sa paghatag ug pag-apud apod sa color coding sa mga tricycles.
Matud pa ni Desiata ang bag-ong komprehensibong Tricycle Route Plan mahimo usab nga kabahin na sa Local Public Transport Route Plan diin apil na niani ang uban pang mga pampublikong de-pasaherong sakyanan sama sa mga multicab, jeepney, bus ug uban pa.
Natapos ang dayalogo nga malipayong nagkasinabot sa maayong buot ang mga tricyle drivers ug ang batan-ong City Administrator.
