Ginhisugtan na sang oversight committee ang pagbalay na lang sang ordinansa agud mahatagan ligwa ang hingyo ni Bishop Patricio Buzon sang Diocese of Bacolod nga panubuan ang curfew hours agud ma-akomodar ang mga magatambong sa Aguinaldo Mass sugod sa Disyembre 16.
Una na nga nagsulat si Bishop Buzon sa city government nga himuon 10:00 PM to 3:00 AM ang curfew hours agud duha ka Aguinaldo Mass ang mapatigayon nga magasugod las-3:30 sang kaagahon.
Nahibaluan nga sa karun, yara na sa 11:00 PM to 4:00 ang curfew sa idalom sang Modified General Community Quarantine santo man sa City Ordinance 934 ukon Expanded Non-Social Period Ordinance of Bacolod City.
Sa interview sang DYHB kay City Legal Officer, Atty. Joselito Bayatan, mas maayo kun ordinansa na lang himuon agud nga mahapos ang pag-conform sini sa mga national policies sangsa pagpaguwa sang Executive Order. Ginapasiguro ni Bayatan nga antes magsugod ang Disyembre 16 may yara na sang ordinansa.
[image: image.png]
