Kasado na karong adlawng Lunes ang lihuk protesta sa kahugpungan sa mga street vendors sa dakbayan sa Butuan uban ang KADAMAY aron isinggit ang ilang pagsupak sa kamandoan ni Mayor Ronnievic Lagnada sa pagbungkag kanila.
Gikan sa Guingona Park mag-martsa ang grupo sa mga street vendors padulong sa city hall. Atubangan sa City Hall ilang ipaabot ni Mayor Lagnada ang pagsupak sa pagbungkag sa ilang pwesto kilid sa kalsada gumikan kay kini lang ang ilang naandang panginabuhian. Dili usab sila pabor sa lugar nga ilang balhinan kay walay halin unya ilang mga baligya.
Gipamugos sa mga street vendors nga wala sila maka-apekto sa dagan sa trapiko kay anaa man sila kilid sa side walk.
Nasigmuyu usab ang ilang grupo sa dihang wala sila giatubang ni Mayor Lagnada sa ilang pagdangop sa city hall sa nakalabyang adlaw diin alas 8 pa sa buntag hangtud alas 5 sa hapon, apan gwardya lang ang niatubang kanila kay milipot sa likod ang Mayor.
Wala pasagdi ni Mayor Ronnievic Lagnada ang mga street vendors human sila gibawalan sa pagbaligya kilid sa sidewalk kay adunay gigahin nga lugar ang syudad nga ilang kabalhinan.
Sigun ni City Councilor Omar Andaya, chairman sa Committee on Trade and Commerce sa Sangguniang Panlungsod, nga ilang gimandoan ang mga street vendors nga mahimu silang mag-display sa tulo ka mga lugar sa Taboan sa Langihan ug sulod sa Integrated Bus Terminal.
Nagtoo si Konsehal Andaya nga mahalin gihapon ang baligya sa mga street vendors tungod kay modagsa ang kapin 4 mil ka mga tawo sulod sa Bus Terminal matag adlaw.
plano sa syudad samtang dili pa mapatuman ang long term solution niini nga problema.
Hugtanong gibarugan sa city hall nga dili gyud displayhan ug baligya ang sidewalk kay “beyond the commerce of men” kini basi sa balaod. (photo FB page of Mayor Lagnada).
