City Health Officer Dr. Emmanuel Plandano tagpaklaro na dili makadaut an tambay sa porga na tagpan-apod-apod sa mga estudyante sa Surigao City Human na tagpaabot an reklamo nan inahan sa isa ka 11 anyos na estudyante gikan sa Mariano Espina Memorial Central Elem. School (MEMCES) na naglain an lawas human na napatumar nan tambay sa porga, tagpaklaro kuman nan City Health Officer Dr. Emmanuel Plandano na dili makadaut an amo na tambay. Tagtudlo niini, tinuig na tagpan-apod-apod nila an tambay sa porga para sa mga kabataan sa lain-laing eskuwelahan. An pagporga kinahanglan para mawaya an bitok suyod sa tiyan lakip para mobalik himsog an mga estudyante labi na adton mga malnourished. Dako an pagtuo ni Dr. Plandano na an pagsakit sa uyo ug tiyan nan 11 anyos na bata posible may lain daan tagbati o sakit ug dili gumikan sa tambay sa porga.
