El City Health Office ta man target alcansa man bakuna con el mas de sien mil mga menor de edad desdel noventay-ocho barangay na entero ciudad de Zamboanga en este tiempo.
Asegun con el OIC City Health Officer Dr. DulceAmor Miravite, desde ya principia sila con el house to house vaccination del Febrero 19 hasta aura, ta alcansa ya na veinte-siete mil mga bata el ya fuede sila man bakuna contra sarampion na deferentes mga barangay.
Pormedio del ayuda del mga volunteer organizations y comunidad, ta mejora sila coneste campanya que hay esta hasta na Marso 23.
Admetido si Dr. Miravite que ta esta bajo el numero del mga mayores que ya conforma manda man bakuna con el diila mga anak por el duda de este vaccination program del Departamento de Salud.
Presentamente, ta intensifica tambien el mga field personnel del CHO con el campanya para convinci con el mga mayores del mga bata chene edad de seiz meses hasta cingco años para manda man bakuna conestos contra sarampion. – Bhong Simbajon/RMN News
