Ipatuman na sa Cagayan de Oro ang ang City-wide Plastic Regulation sugod Enero 1, 2019.
Kini agig pagsanong sa City Ordinance 13378-2018 nga gi-aprobahan na sa konseho ning syudad.
Matud ni Engr Armen Cuenca, Officer in charge sa City Local Environment and Natural Resources Office o Clenro nga ang regulasyon nagpasabot nga dili na mahimong mogamit ang mga dagkong establisemento, sari-sari store ug kamerkadohan sa sando bag.
Kini alang sa mga produktong paliton sa ilang tindahan gawas lamang sa plastic roll bags alang sa mga karne, isda ug processed foods.
Dugang ni Cuenca nga ipatuman sa syudad ang one plastic roll bag policy lamang ug pahamtangan og multa ang mga tindahan nga makasupak niini.
Gipasabot usab ni Elvisa Mabelin, Division Chief sa Solid Waste Management Division sa Clenro nga dili moubos sa tres mil pesos ang multa sa matag sando bag nga gamiton sa mga tindahan.
Base sa datus sa Clenro, mokabat sa 650 tons nga basura ang ma-generate matag adlaw sa Cagayan de Oro ug 62 porsiyento niini recyclable ug reusable sama sa plastic bags ug uban pa.
Gisugdan na usab sa pagpahibalo sa mga personahe sa Clenro ang mga establisemento ug mga negosyante nga minusan na ang ilang pagpalit sa sando bags ug uban pang matang sa plastic bags ug mogamit na lamang sa eco bags o basket.
Matud ni Mabelin nga tumong sa regulasyon nga maminusan ang mga basura nga ilabay sa sanitary landfill aron moabot sa 20 ka tuig ang paggamit niini.
