*General Santos City— Duha ang suspected cases sa Covid-19 sa Gensan nga kasamtangang anaa sa balay tambalanan. Kini ang nahimong pagpaklaro ni Dr. Jett Oco, City Health Officer ning dakbayan.*
*Una matud pa mao ang usa ka senior citizen nga adunay diabetis nga anaa sa usa ka pribadong ospital dinhi sa dakbayan kung asa ginatan-aw pa karon nga posibleng hinungdan sa hilanat niini mao ang komplikasyon sa iyahang sakit gumikan wala matud pa kini nakitaan ug respiratory illness.*
*Samtang ang usa mao ang 46 anyos nga lalaki nga adunay travel history sa Zaboanga City nga nakasinati usab ug hilanat apan aduna matud pa kini diabetis. Nakasulod kini sa gensan gumikan nakatapos matud pa kini ug quarantine sulod sa 14 ka adlaw sa Zamboanga.*
*Dugang pamahayag ni Dr. Oco nga nakasugod na sila sa pagpahigayon ug contract tracing sa mga nakahimamat sa nasangpit nga 46 anyos.*
*Apan subay sa protocol, ginahimo ang contact tracing higayon nga magpositibo ang resulta sa specimen nga gipadala sa SPMC.*
*Pagpaklaro niya nga dili lisod alang kanila ang pagpahigayon ug contact tracing gumikan nalimitahan ang paggawas sa nahisgutan human nga aduna kini gituman nga quarantine protocol sa Zamboanga.*
