Padayon karon ang gihimo nga military ug clearing operations sa mga kasundaluhan batok sa grupong New Peoples Army kon NPA.
Mahinumduman nga niulbo ang engkwentro sa Sitio Gabunan, Brgy. Dumalaguing, Impasug-ong, Bukidnon kagahapon sa kadlawon.
Sa interview sa RMN ngadto kang Lt. Col. Ronald Illana ang outgoing commander sa 8th Infantry Battalion gibutyag niini nga padayon hangtod karon ang gihimong clearing operations sa mao nga dapit.
Matud niya nga hinay ang movement sa ilang tropa tungod kay lasang ang mao nga dapit.
Sa karon gisundan sa military ang tunob sa mga kaaway.
Lisod matud pa nga sudlon ang hideout sa mga NPA tungod kay gipangtamanan kini ug mga landmine.
Samtang sa Kalatungan Range duol sa Lilingayon, Valencia City, nagpadayon usab karon ang gihimong military operation sa kasundaluhan ilawom sa 1st Special Forces Battalion batok sa grupong New Peoples Army kon NPA.
Sa interview sa RMN ngadto kang Lt. Col. Sergio Macarandang, ang batalyon commander sa 1st SFB, gibutyag niini nga daghang tropa silang gipangdeploy sa mga dapit nga ilawom sa ilang area of responsibility apil na sa portion sa Valencia, Malaybalay, Pangantucan ug Lantapan.
Matud niya nga ang engkwentro sa bukid nga bahin sa Lilingayon, resulta sa ilang gipahugtan nga military operations batok sa NPA.
Nahitabo matud pa kini tungod sa sumbong sa mga sibilyan.
Samtang gisiguro usab sa 403rd infantry brigade, Philippine Army nga walay mga sibilyan nga ma-ipit sa mga military operations.
Sa interview sa RMN ngadto kang 403rd Brigade Commander Col. Ferdinand Barandon gibutyag niini nga aduna silay gitawag nga no collateral damage ug gisiguro ang proteksyon sa mga sibilyan.
