Abli na ang Commission on Elections (Comelec) sa mga buot mokuha ug Certificate of Candidacy (COC) alang sa mga buot magpapili sa nagsingabot nga Barangay ug SK elections.
Sa interview sa RMN ngadto kang Atty. Chubasco Caiña, ang city election officer sa Malaybalay, gibutyag niini nga karong Abril 14 hangtod 20 ning tuiga, mamahimo nang makaduso sa ilang COC ang mga buot magpapili.
Dungan niini nagpahinumdom si Caiña nga kadto lamang form kung unsa ang ilang posisyong daganan ang fill-apan.
Dili matud pa generic ang form ug adunay espisipikong porma sa usa ka posisyon.
Libreng makuha ang COC sa ilang buhatan o ma-download gikan sa website sa Comelec.
Minimum lima daw ka form ang angayang fill-apan ug magdala ug documentary stamp ug pa-notaryuhan.
Gitambag usab niini sa mga magpapili nga dili na magdugay-dugay pa sa pagfile sa ilang COC tungod sa gilauman nilang daghan ang moduso tungod kay sa usa lang ka barangay kung atbangan ang walo ka posisyon sa usa ka grupo ug laing walo makabat na sa 16 dugangan pa sa Sangguniang Kabataan nga posisyon mukabat kini sa 32 ka kandidato.
Sa ilang pagbana-bana posibleng mukabat sa 1,400 kapin kon kulang ang mofile sa ilang COC sa dakbayan sa Malaybalay.
