Malaybalay City, Bukidnon – Gitambag sa Commission on Elections (COMELEC) ang publiko nga likayan ang pagparehistro sa last hour aron malikayan ang panaghuot.
Dungan kini sa panawagan sa buhatan sa mga nag-edad ug 15 anyos pataas nga muapil sa voter’s registration nga nagsugod kaniadtong Lunes ug mahuman sa Nobyembre 30 ning tuiga.
Sa interview sa RMN Malaybalay ngadto kang Atty. Chubasco Caiña, ang city election officer sa Malaybalay gibutyag niini nga subling bukas ang ilang buhatan alang sa pagparehistro gikan 8:00 sa buntag hangtod alas 5:00 sa hapon, sugod sa Lunes hangtod Sabado, apil ang adlaw sa holiday sa maong petsa.
Pahinumdom ni Caiña nga apil sa mamahimong ma-transact sa publiko ang registration, reactivation, change/correction of entries ug inclusion o reinstatement of records sa listahan sa mga botante ug walay labot ang transfer.
Gidugang pa sa election officer nga gitun-an pa nila karon ang posibleng mobile registration nga himoon sa Bukidnon State University kon BSU.
