Sugod na ugmang adlawa ang pagpangampanya sa mga kandidato alang sa Barangay ug Sangguniang Kabataan (SK) eleksyon nga gikatakda karong Mayo 14.
Kalabut niini, gipahinomduman sa Comelec ang mga kandidato sa pagsunod sa mga sumbanan nga gipatuman sa poll body alang sa campaign period.
Sa interview sa RMN ngadto kang Atty. Stalin Baguio, ang provincial election supervisor nga apil niini ang paggamit sa pangampanya sa mga posters nga may gidak-on lamang nga 2X3 feet nga angay ipaskil lamang sa mga deklaradong common poster area sa Comelec sama sa plaza, merkado, barangay center, ug mga susama nga lugar.
Kung sa usa ka barangay milapas sa 5,000 ka bontante magtagana nang COmelec ug duha ka designated common poster area.
Samtang matud ni Atty. Baguio nga mamahimong magbutang sa campaign materials ang mga kandidato sa mga private property apan kinahanglan nga adunay pagtugot sa tag-iya.
Hugot nga ginadili sa Comelec ang pagbutang sa mga campaign materials sa mga dalan, tulay, public structure o building, kakahoyan, poste ug kable sa kuryente, mga tunghaan, mga shrine, ug mga susamang lugar niini.
Nakiglambigit na usab ang Comelec sa mga non-government organization sama sa PPCRV alang sa pagpaskil sa mga campaign materials.
