Davao City – Girespeto sumala pa sa Commission on Elections (COMELEC) ang pag-apruba sa Senado nga pagpostpone sa Barangay ug Sangguniang Kabataan (SK) elections ngadto sa Disyembre 5, 2022.
Sa interbyu sa DXDC RMN Davao kang Atty. Krisna Samantha Caballero, spokesperson sa COMELEC-XI, gibutyag niini nga ilang sundon kung unsa may desisyon sa gobyerno kung hingpit mang ma-postpone, ma-suspinde o kaha mahinayon ang piniliay.
“On part of COMELEC, hulat lang mi kung unsay mando kung naay balaod nga mapasa. Mutuman ug mutuman lang gyud mi kung unsay ihatag sa amo nga order. Whether ma postpone, ma-suspend o magpadayon ang atoang barangay election,” saysay ni Caballero.
Nasayran nga bag-ohay lamang nahuman ang duha ka bulan nga COMELEC registration nga gisugdan niadtong Agosto 1 ug nahuman sa Septyembre 30 karong tuiga isip preparasyon sa umaabot nga eleksyon.
Gikalipay usab sa COMELEC-XI spokesperson ang daghanang indibidwal nga midagsa sa buhatan ug nakapaproseso aron makaboto sa maong piniliay.
RadyoMaN Kirby Manzon
