Dakong garbo sa Misamis Oriental ang naangkong kadaugan sa pambato sa lalawigan nga si Bonaparte “Bonjour” Adaza, Jr. human gikoronahan isip 2019 Misters of Filipinas 2nd runner-up niadtong Septyembre 21 ning tuiga sa Filoil Flying V Center, San Juan City, Manila.
Gilampaso ni Bonjour ang laing 20 pa ka kandidato gikan sa nagkalain-laing lugar sa nasud lakip ang gikan pa’s overseas Filipino communities.
Kini ang pinakaunang higayon nga misalmot sa nasangpit nga indigay ang Misamis Oriental.
Mahimong representante si Adaza ngadto sa international male pageantry sa umaabot nga panahon.
Nasayran nga sa wala pa ang koronasyon, gisaad ni Adaza sa katawhan sa Misamis Oriental nga iyang buhaton ang tanan nga iyang makaya aron magdala’g dungog ngadto sa national arena bitbit ang pangalan sa lalawigan.
Matud pa sa ulitawo nga ang iyang kadaugan, kadaugan usab sa tanan hilabina halad niya kini sa labawng makagagahom.
Daku usab ang kalipay ni Misamis Oriental Governor Bambi Emano, uban ang hugot nga suporta ni Atty. Jeffrey Saclot isip Provincial Tourism Officer sa kadaugan nga naangkon ni Adaza.
