General Santos City—Giawhag sa comelec South Cotabato ang tanang mga botante sa probinsya nga tan-awon ang ilang mga pangalan sa voters list sa matag opisina sa Comelec sa mga nagkandaiyang munisipyo sa pribinsya.
Sumala ni Atty. Jay Gerada, Election supervisor sa Comelec South Cotabato nga ila nang napaskil ang voters list sa ilang mga buhatan subay sa kamanduan sa balaud. Dugang pa ni Gerada nga mas maayong karon palang tan-awon na daan sa mga botante ang ilang mga pangalan aron nga miretso na silag boto pag abot sa barangay ug SK election tungod sayod na sila sa ilang mga presento.
Dugang pahayag ni Atty. Gerada nga sa kasamtangan sa mga buhatan palang sa Comelec sila nag paskil sa voters list. Wala pa sa mga eskwelahan tungod dunay mga higayon nga ginatanggal ang voters list nga ilang ginabutang sa eskwelahan.
Samtang mamahimo man usab nga makapangayo ug listahan ang mga barangay ngadto sa Comelec aron nga tua nalang mutan-aw ang mga botante sa matag barangay ug dili na nila kinahanglan pang mahidangat ngadto sa buhatan sa Comelec.
