Nanawagan si 403rd Brigade Commander BGen. Edgardo De Leon sa grupong ‘Karapatan’ nga imbestigahan ang report kabahin sa ‘EJK’ o ‘extra-judicial killings’ ug mga kalapasan sa New People’s Army nga maoy nakapasamot sa kalisud sa kahimtang sa mga Indigenous People ug sa mga nabiktima sa bayolenteng binuhatan.
Mahinumduman nga niadtong Agosto 22, gi-ubanan sa mga sundalo sa 89th Infantry Battalion, 10th Infantry Division ang mga paryente ug pamilya sa tulo ka tawo nga na-“missing” sukad pa niadtong Agosto 2017.
Ang grupo miadto sa Barangay Digongan, Kitaotao, Bukidnon aron masusi ug pamatud-an kung sakto ba o dili ang gisaysay sa usa ka testigo nga nakita niini kung gi-unsa pagpatay ug asa gilubong ang nasangpit nga tulo ka mga na “missing” nga indibidwal.
Pinaagi sa PNP-SOCO, didto napamatud-ang tinuod ang gisulti sa “eyewitness” tungod kay nakalutan ang mga bukog sa tulo ka tawo nga giila sa mga paryente niini nga silang Retired policeman Joel Rey Galendez; army sergeant Reynante Havana España ug IP leader Datu Dionisio Camarullo Havana.
Gibutyag ni De Leon nga ang maong paagi sa NPA klaro nga nakasupak sa “International Humanitarian Law” tungod kay ilang gipatay ang ‘non-combatants’ o walay mga labot sa giyera ug kagubot.
Tungod niini, nanawagan si De Leon sa grupong KARAPATAN kinsa maoy tigbantay sa International Humanitarian Law nga imbestigahan ang maong kaso aron mapahibalo sa katawhan ang resulta sa imbestigasyon.
