Davao City – Ikasa sa Commission on Elections ang Oplan Baklas sugod karong Mayo 4 kutob sa adlaw sa piniliay batok sa mga iligal nga gipangpilit nga mga eleksyon propagandas.
Sa interbyu sa DXDC RMN Davao kang COMELEC Davao spokesperson Atty. Mohammad Omar Samama hugtanon niining gipahibalo sa mga kandidato sa Barangay ug SK nga magpapilit lamang sa ilang mga posters sa designated common poster areas.
“Kung naay mga illegally posted nga mga posters amo ng ibaklas with the help of our partners from the PNP and AFP. Likayan na lang gyod nila nga bisan asa lang magbutang og posters,” sumala ni Samama.
Gidili ang pagbutang og mga posters sa punuan sa kahoy, tulay, eskwelahan, simbahan, gambalay, poste sa kuryente, pribadong propyedad nga walay pagtugot sa mga tag-iya, ug mg kadalanan.
Adunay angay nga sundon nga sukat ang mga kandidato alang sa ilang mga election campaign materials:
1) Leaflets: 8.5″ × 14″ maximum o long bond paper
2) Posters : 2ft x 3ft maximum o approximately the size of cartolina
3) Streamers: 3ft x 8ft maximum
Pahimangno sa COMELEC sa mga mupapili nga ang mga streamers gamiton lang kini atol sa public rally o meeting ug tanggalon dayon human sa aktibidad.
Gimanduan usab ang tanang kandidato nga dapat anaay “This material should be recycled” nga nakabutang sa ilang mga posters.
Mamahimong mapriso sulod sa usa ka tuig o di mulapas sa unom ka tuig ang mga malapasaon.
Dugang niini mamahimong ma-disqualified ang kandidato kung mapamatud-ang adunay mga violations.
RadyoMaN Aimee Guinita
