Davao City – Gipakusgan karon sa Compostela Valley Province ang pagpangandam batok sa unsa mang kalamidad labi na panahon sa ting-ulan.
Sa interbyu sa DXDC RMN Davao kang Jayvee Tyron L. Uy, ComVal governor, nagpahimangno kini sa mga residente sa probinsya nga kanunay’ng magmatngon ug magmonitor sa mga anunsyo labi na sa dagan sa panahon.
“Always lang ta maminaw sa radyo. Sa atong mga social media accounts, sa ‘Compostela Valley Province’ ug ‘Aksyon ComVal’ para sa mga announcements, mga balita labot sa weather status nato,” saysay ni Uy.
Saysay ni Uy nga angay gayong mamahimong alerto kanunay ang mga residente labi na kadtong nahimutang sa mga lugar nga bahaonon ug kadtong duol sa mga minahan aron malikay panahon sa kalamidad.
“We know nga ang ComVal is a perennial, naa gyud tay pagbaha labi na sa district one. So, watch out labi na ‘tong mining areas always gyud ta magbantay,” tataw ni Uy.
Nasayran nga ang bulan sa Hulyo gikonsiderang National Disaster Resilience Month (NDRM) diin karong tuiga, 2019 aduna kini temang “Kahandaan sa Sakuna’t Peligro Para sa Tunay na Pagbabago.”
RadyoMaN Kirby Manzon
