Nigawas na ang resulta sa confirmatory testing sa coronavirus disease o COVID-19 sa pito ka pasyente nga na-admit sa Northern Mindanao Medical Center o NMMC ning syudad sa Cagayan de Oro.
Matud ni Dr. Jose Chan, Medical Director sa NMMC nga niadtong Huwebes lamang, Abril 23 nigawas ang resulta sa mga suspected cases.
Gipasabot ni Dr. Chan nga lima niini ang nag-negatibo ug duha ang positibo sa COVID-19.
Sa nag-negatibo sa COVID-19, duha ang taga Misamis Oriental, usa ang dunay address nga Davao/Cagayan de Oro, usa taga Marawi City ug usa ang dunay address nga Cagayan de Oro / Marawi.
Sa duha nga nag-positibo, usa niini taga Marawi City ug usa taga Barangay Camaman-an, Cagayan de Oro nga unang na-confine sa NMMC Abril 17 pero namatay pagka Abril 18.
Sa karon tulo ka pasyente na ang COVID-19 positive nga naa sa NMMC.
Duha niini ang daang confirmed COVID-19 positive nga taga Lanao del Norte ug taga Marawi City, ikatulo ang nadugang nga taga Marawi City.
Samtang, lima usab ka pasyente nga negatibo sa COVID-19 ang nagpabilin sa NMMC ug usa ka pasyente nga taga Misamis Oriental ang naghulat sa resulta sa confirmatory testing sa COVID-19.
