Roxas City, Capiz- Ginpasidonggan sang Department of Education (DepEd) – Roxas City Division ang mga tagdaog sa “Search for the 2018 Brigada Eskwela Best Implementing Schools” sa elementarya subong man sekondarya sa ginpatigayon nga programa sang Setyembre 20, 2018 diri sa syudad sang Roxas.
Samtang ginpasalamatan man ni Mrs. Felisa Beriong nga OIC Schools Division Superintendent sang DepEd – Roxas City sa programa ang lokal nga panguluhan sang Roxas City, mga opisyal sang kabaranggayan, pribado nga mga kompanya, negosyante, iban nga mga ahensya sang gobyerno kag mga miyembro sang komunidad nga nagsuporta sa Brigada Eskwela.
Gindugang pa ni Beriong nga kon indi tungod sa suporta sang nagkalainlain nga sektor wala man sang mga “best school implementer.”
Nahibaluan nga ang mga tagdaog nga mga eskwelahan sa elementarya sa “Small School Category” amo ang Tanza Elementary School bilang 2nd runner up; Anatolia Arcenas Memorial School bilang first runner up; kag Don Jose Acevedo Elementary School bilang champion.
Sa Medium School Category – Elementary, ginpasidunggan ang Don Francisco Dinglasan Memorial School bilang 2nd runner up; Don Conrado Barios Memorial School bilang 1st runner up; kag Plaridel East Elementary School bilang champion.
Samtang sa Large School Category – Elementary, ginpasidunggan ang President Manuel Roxas Memorial School North bilang 2nd runner up; Banica Elementary School bilang first runner up; kag Don Ynocencio Del Rosario Memorial School bilang champion.
Sa sekondarya nga lebel sang mga eskwelahan ang award para sa Small School Cateqory ang nakuha sang Olotayan lntegrated School bilang champion.
Sa Medium School Category – Secondary, ginpasidunggan ang Dumolog National High School bilang 1st runner up; kag Marcos Fuentes lntegrated School bilang champion.
Dugang pa sa mga awardees sa pampubliko nga eskwelahan sa sekondarya amo ang Tanque National High School bilang first runner up kag Roxas City School for Philippine Crafismen bilang champion sa Large School Category – Secondary.
Ang Congressman Ramon A. Arnaldo High School amo naman ang champion para sa Mega School Category – Secondary.
Nahibaluan nga ang Plaridel East Elementary School kag Don Ynocencio Del Rosario Memorial School ang nagbaton sang Hall of Fame Award sa nasambit nga programa.
Ang tanan nga tagdaog ang ginkantahan sang “We Are the Champions” bilang dugang nga pagkilala kag pagdayaw sa talalupangdon nga hinimuan kaangot sa karon nga tuig nga Brigada Eskwela nga ginlunsyar sadtong Mayo 28 sa Don Ynocencio Del Rosario Memorial School sa Brgy. Dayao, syudad sang Roxas agud mapreparar ang mga eskwelahan sa Hunyo 4 nga pagbukas sang klase. (AAL/PIA Capiz) ni Alex A. Lumaque
photo © Alex Lumaque/PIA-Capiz
