Ginrekomendar ni Iloilo City Lone District Congresswoman Julienne “Jam-Jam” Baronda ang pagsuspend sang pila ka adlaw sang klase ilabi na sa mga Elementary Schools sa siyudad sang Iloilo agud hatagan ligwa ang malapnagon nga pagpaninlo.
Ginhimo ni Baronda ang rekomendasyon sa Department of Health sa tunga sang mataas nga kaso sang dengue sa siyudad.
Ginhatagan pagtamod ni Baronda nga bilang isa man ka iloy, iya nahibaluan nga nagakabalaka man ang mga ginikanan sa tion nga mag-eskuwela ang mga kabataan nga mahimo mabiktima sang dengue.
Suno sa kongresista nga apesar naghagan-hagan na ang kaso sang dengue, apang indi dapat magkampante ang publiko bangud padayon pa ang pag-ulan-ulan.
Kag agud matapna ang pagmuad sang mga lamok, dapat ang malapnagon nga pagpaninlo sa mga eskuwelahan kag kinahanglan nga suspendihon anay ang klase sa mga elementary schools.
Ginahulat na lamang ni Baronda ang mangin aksyon sang DOH sa iya rekomendasyon.
