Construction Worker, arestado sa kasong Child Abuse

Gibalhog na karon sa bilangguan ang usa ka construction worker human nasikop sa kasong Child Abuse atol sa operasyong gipahigayon sa mga kapulisan pasado alas 8 kagahapon sa buntag didto sa Purok-3, Barangay San Pedro, Initao, Misamis Oriental.

Gipangunahan sa Kitaotao Municipal Police Station ang maong operasyon inabagan sa mga operatiba sa rehiyon nga miresulta sa pagkasikop ni Jelou Acul Cubio, 29 anyos, minyo, construction worker, ug residente sa Balungating, Gipus, Zamboanga Del Sur.

Gipasakaan og warrant of arrest ang suspek sa paglapas sa RA 7610 kon ang Special Protection Against Child Abuse, Exploitation and Discrimination Act, nga nakadokit ilawom sa Criminal Case no. 39139-22, nga gi-issue ni Wilfredo G. Bibera Jr., Acting Presiding Judge, Branch 46, 10th Judicial Region, pinitsahan Hulyo 19, 2022 ug mukabat ang girekomendang piyansa ngadto sa P200,000.00 alang sa temporaryong kagawasan.

Gikustudiya na karon sa Kitaotao Municipal Police Station ang suspetsado alang sa tokmang disposasyon.