Davao City – Wala makaikyas sa kamot sa mga otoridad ang usa ka construction worker human nasikop tungod namaligya og gituohang marijuana kagahapong adlawa, October 23, 2018 bandang alas 2:45 sa hapon sa Poblacion, Sta. Maria, Davao Occidental.
Subay sa report sa Philippine Drug Enforcement Agency kun PDEA-XI, giila ang dinakpan nga usa ka Sanawe Limboran alyas Sanawe, 29 anyos, ug residente sa Sitio Tibungoy, Barangay Poblacion, Sta. Maria, Davao Occidental.
Naaresto si Limboran human napalitan og duha ka pakete sa gituohang marijuana sa nagpakaaron ingnong buyer nga nagkantidad og 500.00 pesos.
Dugang niini, nakuha usab gikan sa iyaha ang gituohang dried marijuana ug 500.00 pesos buy-bust marked money atol sa buy bust operation.
Mag atubang ang arestado og kasong adunay kalapasan sa Section 5 and Section 11, Article II sa Republic Act 9165 kun Comprehensive Dangerous Drugs Act of 2002.
Ang maong operasyon gilusad sa Davao Occidental Provincial Office, Davao del Sur Provincial Office of Philippine Drug Enforcement Agency ug Sta. Maria Municipal Police Station.
RadyoMaN Renz Barbarona
