Daling mi responde ang mga ginsakpan sa kapulisan sa Police station 2 nga anaa sa may Nonucan, Maria Cristina ning dakbayan sa Iligan human sa tawag nga ilang nadawat ala una sa kadlawon niadtong nakalabayng adlaw gumikan sa gikataho nga illegal nga aktibidadis sa may Zone Mars, Barangay Suarez ning dakbayan sa Iligan.
Sa paghidangat sa operatiba sa nasangpit nga lugar, nasapon sa akto nga nag pot session ang mga suspetsado nga naila nga si Narciso Santos Jr. 43 anyos minyo, usa ka construction worker, ug residente sa nasangpit nga lugar. Ingon man si Gabrielle Mark Lacida Tamondong, 22 anyos, usa ka utility worker, Karl Kevin Lacida Tamondong, 20 anyos, dunay live-in partner, walay trabaho, nga taga Zone Mars, sakop sa barangay Suarez, ug si Giovannie Sianco Bihag, 30 anyos single, usa ka construction worker, ug molupyo sa nasangpit nga dapit.
Nakuha gikan sa possession sa mga suspek, ang usa ka aluminum foil, ug duha ka lighter. Nakuha usab sa possession ni Gabrielle Mark Lacida Tamondong, ang usa ka small size plastic sachet sa gituohang shabu.
Ang mga arestadong suspek anaa gibalhog sa station 2 samtang gihikay ang kaso nga ipasaka batok kanila.
