Consultative Meeting tagtakda ipatawag sa Enero 28 sa tanan residente sa Purok Pag-asa, Capitol, Brgy. Washington, Surigao City na naapektuhan sa landslide
Sumaya pa ni Brgy. Capt. Christopher Bonite nan Brgy. Washington kinahanglan mapahibayo sa mga maapektuhan na residente an mga sunod na lakang na himoon human nahitabo ganina an pagdahili sa lupa.
Tagtudlo niini, una na mipadayag nan sumbong an Purok Chairman sa Purok Pag-asa kalabot sa pagkabhang nan lupa ugsa na ija dajon tagpaabot an tambag na kinahanglan na mangimpake na dajon para mapabalhin sa mas luwas na lugar. Lakip na mitawag dajon sija sa City Disaster Risk Reduction Management Office kaiban an kadagkuan sa Mines and Geosciences Bureau para sa site inspection na taghimo ganina hapon.
Dugang pa ni Bonite, base sa ija nahibaw-an sugod pa sa miagi na administrasyon balik-balik ra an problema sa pagdagsang nan mga nagtukod nan panimayay sa Purok Pag-asa lakip sa Upper Bonotan, ini bisan sa report sauna nan MGB na kritikal an lugar sa landslide. Pinaagi sa Consultative Meeting naglaum sija na may kongreto ug penal na aksiyon na mahimo an barangay labi na sa lokal na gobyerno sa Surigao City sa amo na sitwasyon.
