Gipunto niini ug sa uban pang netizens nga kung basehan ang hulagway sa tulay, dili kalidad nga materyales ang gigamit hinungdan sa pag-collapse. Samtang kumento sa ubang netizens nga dili pulido o lig-on ang pagkatrabaho sa proyekto.
“Imposible og mahugmak dayon nga bag-o pa man kaha na nga project. Sayang lang kaayo ang gasto. Dapat manubag ang engineer ug contractor ana,” kumento ni Jovelyn.
Gibutyag ni Dean Ortiz, tigpamaba sa Department of Public Works and Highways (DPWH-XI), ang contractor ang adunay responsibilidad sa pagkahugmak sa maong tulay, diin duha (2) ka trabahante ang nasamdan.
“Kini sya man gud is an ongoing project. So, ang liability ani is still to the contractor. Kay diha naman nato makit-an gud ang defect diba kung halimbawa mahuman na ang trabaho. Pero kini siya, ongoing pa man. So, ang responsibilidad anaa pa sa contractor,” tataw ni Ortiz.
Gisugdan ang tulay niadtong Disyembre 2020 ug upat ka semana nalang unta aron mahuman, apan tungod sa insidente, laumang adunay pagkadelatar una mahuman ang proyekto.
Samtang, gipasalig usab sa contractor nga tabangan ang duha ka trabahanteng samaran nga daling gidala sa hospital.
RadyoMaN Kirby Manzon
