Roxas City, Capiz – Isa ka coordinating conference angut sa preparasyon sa palaabuton nga Capiztahan 2019 ang ginpatigayon sa Transformation Hall, Camp Apil, Brgy Lanot, Roxas City.
Ang nasambitan nga aktibidad ang ginpangunahan ni CPPO Provincial Director PSSupt. Canilo Fuentes nga amo naman ang commander sang Security Task Group kaupod sanday Triaksyon Course Director Mr. Jose “Pepe” Borres kag Mr. Rufin Vesorio halin sa Provincial Tourism Office.
Samtang yara man ang presensya sang mga katapo sang task group nga ginalakipan sang PDRRMO, Phil Army, Phil Coast Guard, Capiz Maritime Group, Capiz AVSE Group, Highway Patrol Group, Traffic Management Unit sang Roxas City, BFP, mga hepe sang kapulisan kag iban pa nga mga Task Unit Commanders.
Gin-enganyo man ni PSSupt. Canilo Fuentes ang tanan nga membro sang Task Group Capiztahan 2019 nga suportahan ang pag-implementar sang security plan sa tiun sang nasambitan nga aktibidad.
Ginpunto sini nga magadepende sa kooperasyon sang tanan ang kadalag-an sang pagpatigayon sang Capiztahan 2019.
Sa matandaan sa ginpatigayon nga labing una nga coordinating conference sa Transformation Hall sa Camp Apil, ginpresentar sang tagsa ka mga task group ang security plan agud nga mapasiguro nga safe kag matalunsay ang pagselebrar sang amu nga tuigan nga selebrasyon sang pagpondar sang gobierno-sibil sang Capiz.
photo © Capiz PPO PCR
