Davao City – Pasakaan og kaso sa Davao City Police Office (DCPO) ang usa ka lalaking nagpresenta’g peke nga RT-PCR result ug dili insaktong mga impormasyon kinsa anaa na karon sa kustodiya sa mga awtoridad.
Giila pinaagi sa post sa official page sa City Government of Davao ang lalaki nga si Frederick Panol Grande, residente sa Bloomfields, Lanang ning dakbayan.
Gikumpirma sa lokal nga panggamhanan nga positibo kini sa COVID-19 apan gi-tamper ang iyahang resulta aron ingnong negatibo kini diin gipamatud-an usab sa testing center nga gipeke niini ang iyahang resulta.
Sa interbyu sa RMN Davao kang DCPO spokesperson Police Captain Rosario Aguilar, iduso ang kasong paglapas sa RA 11332 ug Falsification of Public Documents.
“Mao niy timailhan nga seryoso ang inyong kapulisan sa pagpasaka’g complaint sa piskalya didto sa mga violators nga atong ginapatuman nga balaod ilabina sa health protocols,” sumala ni Aguilar.
Segun kang Aguilar nitahan si Grande sa Tent City sa Davao International Airport.
RadyoMaN Aimee Guinita
