Sa labing unang higayun nakighinabi sa Media sa dakbayan sa Butuan si Jose Maria Sison, ang founder sa Communist Party of the Philippines – National Democratic Front of the Philippines (CPP-NDFP) kagahapon sa hapon.
Sulod sa Mazaua resort nakig-estorya si Sison sa media pinaagi sa skype direkta didto sa The Netherlands diin siya naka-asylum.
Pipila sa mga gihisgutan atol sa press conference ang isyu sa West Philippine Sea, ang pag-uli sa giingung ill-gotten wealth ni kanhi Pangulo Ferdinand Marcos, ang peace talk ug daghan pa.
Sa isyu sa West Philippine Sea, pabor si Sison nga kinahanglan mapunta sa Pilipinas ang giilogang teritoryo base sa United Nations Convention on the Law of the Sea (UNCLOS).
Pabor usab si Sison sa pag-uli sa giingung ill-gotten wealth sa pamilyang Marcos apan kinahanglan siguradoon nga mapatubag gihapon sila sa kasong criminal.
Sa hisgutanang hinabing pangkalinaw gibutyag ni Sison na aduna pay posibilidad nga subling mabuksan ang peace talk tali sa goberno ubos sa liderato ni Pang. Rodrigo Duterte bisan ug gihunong na kini sa goberno.
Tungod kay walay pormal nga pag-terminate ang gihimu sa goberno para sa peace talk. Sa kanunay andam usab ang NDFP nga modawat kung gusto sa gobyerno ang subling paglingkod alang sa hisgutanang pangkalinaw.
Niya pa nga mabaliwala ang away nila ni Pang. Duterte kung subling buksan ang peace negotiation.
Dugang pa niya nga laos na ang demand sa goberno nga ipadayun lang ang peace talk kung mosurender ang mga NPA tungod kay dili gyud kana mahitabu.
