Roxas City, Capiz – Ginkumpirmar ni Provincial Director Col Canilo Fuentes nga wala sang pulis nga assigned sa Capiz PPO ang nalakip sa druglist nga ginpaguha ni PNP Chief Oscar Albayalde.
Suno diri nga padayon ang ila nga ginapatigayon nga internal cleansing sa ila hanay kag sa pagkamatuod nagpatigayon sila sang random drug testing sa mga katapo sang kapulisan sa diin negatibo naman ang mga ini sa pag-usar sang ginadilian nga druga.
Sa mahibaloan nga una na nagpaathag ang Police Regional Office (PRO) 6 kon ngaa indi nila mapangalanan ang 33 ka pulis sa Western Visayas nga ginhingadlan ni PNP Chief Oscar Albayalde nga imbolbado sa operasyon sang ilegal nga droga.
Suno kay PRO-6 spokesperson Police Lt. Col. Joem Malong, confidential ang ini nga impormasyon rason nga wala sila sang breakdown sang pangalan, rangko kag assignment sang mga natungdan.
Sa karon suno kay Malong, gina-monitor ang 33 ka mga pulis kag ipaidalom sa adjudication agud masigurado kon husto ang akusasyon ukon indi.
