Davao City – Gitino karon sa City Transport and Management Office (CTTMO) nga usa lamang ka augmentation bus ug wala nagpasabot nga ma-phase out na ang mga PUJs dinhi sa syudad partikular sa Toril ug Catalunan Grande.
Sumala ni CTTMO chief ret. Col. Dionisio Abude nga gibase lamang nila kini sa mga reklamo sa commuters sa maong mga area sanglit maglisod na kini og sakay sa peak hours paingon sa downtown ug pauli sa ilang mga lugar.
“Nagpatigayin ta og survey mga almist one week didto sa Toril, Catalunan ug dinhi sa downtown unya katong mga nagtapok-tapok nga mga pasahero indibidwal sila nga gipangutana kung asa sila mupaingon,” saysay niini.
Matud ni Abude nga atol sa ilang survey, mokabat sa 1,400 ka mga pasahero sa Toril ang nagpaabot og wala kasakay gikan alas-6:30 hangtod alas-8:30 sa buntag diin ang 800 niini paingon sa downtown ug adunay pipila nga mubaba sa Bangkal o Matina areas susama sa mahitabo sa mga pasahero sa Catalunan Grande.
Gani mao usab ang kahimtang sa mga pasahero nga gikan downtown nga muadto pa sa Roxas aron makasakay lang og Toril nga jeep sanglit maglisod na og sakay pabalik sa maong mha areas.
Gumikan niini, adunay 12 ka mga bus units ang i-augment sa duha ka mga lugar — tig-unom sa Catalunan Grande ug Toril diin magsugod kini og operate alas-6:30 matag buntag ug alas-5:00 sa hapon aron i-akomodar ang mga natanggong nga pasahero gikan downtown pauli sa ilang mga lugar.
Apan mag depende gihapon ang ilang oras sa pag-operate kung aduna pay mga nahibiling natanggong nga pasahero.
RadyoMaN Jason Amisola
