Davao City – Gisuportahan sa Department of Agriculture (DA) ang aktibidad sa mga meat vendors sa Bankerohan Public Market nga libreng pagpakaon og karneng baboy sa publiko aron mapasabot nga luwas kining kaonon ug dili kini apektado sa African Swine Fever (ASF).
Sa interbyu sa DXDC RMN Davao kang Noel Provido, spokesperson sa DA-XI, gibutyag niini nga luwas nga kaonon ang karneng baboy basta nagbaton kining ‘certification’, pasabot nga napailawom kini sa inspection.
“Sa mga consumers, it is safe to eat pork provided nga naa siyay meat certification,” saysay ni Provido.
Kagahapong adlawa, Marso 4, 2020 sa dihang miduyog usab ang mga indibidwal gikan sa lain-laing ahensya sa gobyerno sa libreng salo-salo nga gi-andam sa mga taga meat section sa palengke diin gidugok sa nahisgutan ang pito ka lechon baboy ug uban pang putahe.
Nasayran nga gi-angkon sa mga meat vendors nga mihinay ang ilang kita sa karneng baboy tungod sa kahadlok sa publiko sa sitwasyon sa ASF diin pipila ka mga lugar sa Davao region ang naapektuhan.
RadyoMaN Kirby Manzon
