Pagadian City – 25 ka mga drivers sa pasaheroang sakyanan ang nagpositibo sa paggamit sa illegal nga droga. Kini ang resulta human gipahigayon sa Philippine Drug Enforcement Agency Region 9 kauban sa LTO, LTFRB, PNP ug Zamboanga City Anti-Illegal Drug Abuse Council ang OPLAN HARABAS [Drug Test Muna Bago Pasada] kagahapong adlawa.
Ang mga gipailalum sa drug test mao ang mga drivers sa tricycle, taxi, jeepneys ug mga express van sa lima ka managlahing dapit sa terminal sa Zamboanga City: ang San Roque Terminal, Divisoria-IBT Terminal (Plaza Pershing), Dreamville Ayala, Canelar (Avon) area, KCC Mall ug IBT Terminal dinhi sa syudad sa Pagadian.
Tumong niini nga aktibidad ang pagsiguro sa seguridad sa publiko ug mga pasahero. Tinguha usab niini ang paglikay sa mga aksidente sa kadalanan gumikan sa paggamit sa mga transport drivers sa illegal nga droga.
Gawas pa niana, gipahigayon usab kagahapong adlawa ang K9 panelling/sweeping sa mga piniling terminal gamit ang mga K9 dogs sa PDEA 9.
Atol usab sa aktibidad, gipang-apod apod sa PDEA 9 ang mga PDEA comics ngadto sa mga drivers.
Sa syudad sa Zamboanga, 24 sa 571 ka mga drivers ang nagpositibo sa drug test. Tungod niini, daling giturn-over ang ilang mga licensya ngadto sa LTO alang sa tukmang disposasyon samtang dinhi sa syudad sa Pagadian, 1 sa 125 ka mga transport drivers ang nagpositibo human gipailalum sa drug test.
