Nagalab-ot sa P100k nga kantidad sang shabu kag 6 ka kilo sang marijuana ang nakumpiskar sang mga katapo sang Philippine Drug Enforcement Agency (PDEA 12) sa ginpatigayon nga anti–drug campaign sang tinalikdan nga adlaw sa bahin sang Tampakan, South Cotabato kag Tacurong City Sultan Kudarat.
Sa ginpatigayon nga buy-bust operation sang gintingob nga pwersa sang PDEA 12 kag Tampakan MPS sa Purok 5, Brgy. Maltana sa banwa sang Tampakan arestado ang ginakabig nga high value target nga ginkilala kay Charwin Del Mundo Loplop, alias Toto, 30-anyos, jobless kag residente sang nasambit nga lugar.
Nakuha sa suspek ang 9 ka heat sealed sang ginaaligar shabu nga may kabug-aton nga more or less 20 grams kag nagakantidad sang P100, 000.00, tatlo ka disposable lighters, 1 ka all – weather tooter, 9 ka empty transparent plastic sachets, 1 ka surgical scissor, 1 ka unit sang android phone kag P500.00 marked money.
Si alias Toto ang responsable suno pa sa pagpalapta sang illegal drugs sa banwa sang Tampakan kag kaingod nga banwa.
Sa ginpatigayon naman nga anti-narcotic operation sa Diego Silangan St., Brgy. Poblacion, Tacurong City Sultan Kudarat, arestado ang isa ka targetlisted sang PDEA 12 nga ginkilala kay Vic Cabaging Abuton , alias Ping-Ping, 40 –anyos, mangunguma, kag residente sang nasambit nga lugar.
Nakuha naman sa suspek ang more or less 6 ka kilo sang marijuana nga nagakantidad sang 21,000.00 kag P100.00 marked money.
Magapangatubang naman ang mga suspek sang kaso nga pagbayolar sa Sections 5 kag 11 sang RA 9165 ukon “The Comprehensive Dangerous Drugs Act of 2002” nga sa subong nakadetine sa PDEA XII Detention Facility.
Samtang dugang naman nga kaso nga pagbayolar sa Section 12 ang ipasaka batok kay Alias Toto. photo credit to:PDEA 12
