Davao City – Gipanawagan sa Barangay Lasang ngadto sa Department of Public Works and Highways (DPWH-XI) ug uban pang buhatan ang nahugno nga portion sa tulay sa lugar.
Gibutyag ni Kapitan Allan Simo-ag sa Barangay Lasang pinaagi sa I luv Lasang Facebook page, nga laing portion sa River Control ang naguba tungod sa pagbaha sa milabay nga adlaw diin kini padayon nga gina-monitor sa Barangay Disaster Risk Reduction and Management Office (BDRRMO).
Matud ni Kapitan Simo-ag, gipaabot na usab nila sa Office of the City Mayor ang sitwasyon sa naguba nga inprastraktura aron kini daling maaksyonan ug dili mohatud og risgo sa maapektuhang lugar panahon nga mokusog ang ulan.
“Atong gihangyo ang DPWH labi na gyud ang District Engineering Office nga tan-awon ni siya nga portion, i-facilitate aron pud matagaan og pondo para sa umaabot, mahatag nato ang atoang aksyon nga kinahanglan nato itigayon aron mamahimong efficient, epektibo ang pagmontar og river control dinhi mismo sa Lasang river,” panawagan ni Simo-ag.
Kahinumduman, pipila ka mga pamilya ang gihikling samtang daghang motorista ang nahasol human sa lawom nga pagbaha sa milabay nga adlaw sa Brgy. Lasang, Bunawan District ning syudad sa Davao.
RadyoMaN Kirby Manzon
